"हंसा-२०२५" दिवाळी अंकाला "आवाजकार मधुकर पाटकर स्मृती सर्वोत्कृष्ट पुरस्कार"

गोमंतकीय ज्येष्ठ पत्रकार प्रिया कालिका बापट संपादित दिवाळी अंक

 

मराठी वृत्तपत्र लेखक संघ मुंबई यांच्या प्रतिष्ठित ५० व्या राज्यस्तरीय दिवाळी अंक स्पर्धेत गोमंतकीय ज्येष्ठ पत्रकार प्रिया कालिका बापट संपादित आणि मनसा क्रिएशन्स प्रकाशित "हंसा-२०२५" दिवाळी अंकाला "आवाजकार मधुकर पाटकर स्मृती सर्वोत्कृष्ट पुरस्कार" प्राप्त झाला आहे. मुंबईचे उपमहापौर संजय घाडी यांच्या हस्ते पुरस्कार प्रदान करून बापट यांना सन्मानित करण्यात आले.

यावेळी व्यासपीठावर उद्योजक अशोक पाटील, ऋतुरंगचे संपादक अरुण शेवते, चंद्रकांतच्या संपादिका श्रीमती निलिमा कुलकर्णी, मराठी वृत्तपत्र लेखक संघाचे अध्यक्ष रवींद्र मालुसरे, प्रमुख कार्यवाह प्रशांत घाडीगावकर, दादर सार्वजनिक वाचनालयाचे कार्याध्यक्ष मनोहर साळवी, मराठी विचारधारा प्रतिष्ठानचे विश्वस्त विकास होशिंग, माजी नगरसेवक ऍड मनमोहन चोणकर, ऍड देवदत्त लाड, संजीव गुप्ते आदी मान्यवर उपस्थित होते. संघाध्यक्ष रवींद्र मालुसरे यांनी संस्थेच्या कार्याचा आढावा घेतला. मराठी भाषेच्या संवर्धनासाठी आणि दर्जेदार दिवाळी अंक परंपरेच्या जतनासाठी गेली पाच दशके ही राज्यस्तरीय स्पर्धा संघाच्या वतीने सातत्याने आयोजित केली जाते. राज्यभरातून प्रकाशित होणाऱ्या विविध दिवाळी अंकांमधून यंदा ५० व्या स्पर्धेअंतर्गत उत्कृष्ट आशय संपादकीय दृष्टी, मांडणी आणि साहित्यिक गुणवत्ता या निकषांवर दिवाळी अंकाची निवड करण्यात आली असल्याचे रवींद्र मालुसरे यांनी आपल्या प्रास्ताविकात सांगितले.

यंदा मुंबई मराठी वृत्तपत्र लेखक संघाचे अमृतमहोत्सवी वर्ष असून, मराठी भाषा गौरव दिनाचे औचित्य साधत दादर सार्वजनिक वाचनालय आणि काशिनाथ धुरू सभागृह यांच्या सहकार्याने संघाने दिवाळी अंकांचे पुरस्कार प्रदान केले. यावेळी प्रमुख पाहुणे या नात्याने बोलताना उपमहापौर संजय घाडी म्हणाले, मराठीची खरी ताकद तिच्या बोलीभाषेत आहे. मराठी ही केवळ एक भाषा नाही, तर ती आपली मराठी माऊली आहे. शिवरायांच्या तलवारीच्या तेजासोबतच मराठी भाषेने स्वराज्याचा स्वाभिमान जपला. आज जगातील पहिल्या १५ प्रमुख भाषांमध्ये मराठीचा समावेश होतो, ही आपल्यासाठी अभिमानाची गोष्ट आहे. शतकापासूनची दिवाळी अंक परंपरा यापुढेही जोपासायची असेल तर जास्तीत जास्त मराठी माणसांनी दिवाळी अंक विकत घेऊन वाचले पाहिजेत, अंक वाचणे म्हणजेच मराठी संस्कृती टिकवणे होय. असेही ते पुढे म्हणाले. 

यावेळी संघाच्या वतीने घेण्यात आलेल्या सुवर्णमहोत्सवी दिवाळी अंकांचा तसेच स्पर्धेतील इतर दिवाळी अंकांच्या संपादकांचा गौरव करण्यात आला. मनोरंजनकार' का र मित्र स्मृती सर्वोत्कृष्ट अंक - नवलाई ( कार्यकारी संपादक- प्रभू कापसे डोंबिवली ) यांना प्रदान करण्यात आला. साने गुरुजी स्मृती सर्वोत्कृष्ट मुलांचा अंक - लाडोबा (घनश्याम पाटील, पुणे) यांना प्रदान करण्यात आला. आश्रय -विनय गावकर, (गोवा कवी बा.भ.बोरकर पुरस्कार), मौज - मोनिका गजेंद्रगडकर, मुंबई  ( कथाकार अनंत काणेकर स्मृती पुरस्कार ),ऋतुरंग - अरुण शेवते, मुंबई  ( कवी वसंत बापट स्मृती पुरस्कार ), वसंत - दिलीप देशपांडे, मुंबई   (कवयित्री शांता शेळके स्मृती पुरस्कार ),हंस - अभिराम अंतरकर, पुणे  ( साहित्यिक जी.ए. कुलकर्णी स्मृती पुरस्कार ), चंद्रकांत आणि धनंजय  - श्रीमती नीलिमा कुलकर्णी,मुंबई  ( गझलकार सुरेश भट स्मृती पुरस्कार ),आवाज - भारतभूषण पाटकर, मुंबई  ( साहित्यिक प्र.के. अत्रे स्मृती पुरस्कार ), कालनिर्णय - जयराज साळगावकर, मुंबई ( साहित्यिक रणजित देसाई स्मृती पुरस्कार ),धनुर्धारी - नंदकुमार सापळे ( जयंत नारळीकर स्मृती पुरस्कार ),नवाकाळ - रोहित पांडे, मुंबई ( साहित्यिक शिवाजी सावंत स्मृती पुरस्कार ), दीपावली - अशोक कोठावळे, मुंबई  (साहित्यिक जयवंत दळवी स्मृती पुरस्कार ), मेनका,माहेर, जत्रा   - सुमित टेकाळे, पुणे   (कविवर्य ग.दि. माडगूळकर स्मृती पुरस्कार ) आदींना  सुवर्णमुद्रा दिवाळी अंक पुरस्कार प्रदान करण्यात आला. "हंसा- २०२५" दिवाळी अंकाचा सन्मान म्हणजे सर्व सह भागी लेखक, कवी-कवयित्रींचा सन्मान, मनसा क्रिएशन्सचा सन्मान. अश्या शब्दात प्रिया कालिका बापट यांनी आपले मनोगत व्यक्त केले. त्यांच्या या यशाचे सर्वत्र कौतुक होत आहे.

मुंबईचे महापौर संजय घाडी यांच्या हस्ते मुंबई मराठी वृत्तपत्र लेखक संघाचा "आवाजकार मधुकर पाटकर स्मृती सर्वोत्कृष्ट पुरस्कार" स्वीकारताना संपादक प्रिया कालिका राजेंद्र बापट. सोबत उद्योजक अशोक पाटील, ऋतुरंगचे संपादक अरुण शेवते, चंद्रकांतच्या संपादिका श्रीमती निलिमा कुलकर्णी, मराठी वृत्तपत्र लेखक संघाचे अध्यक्ष रवींद्र मालुसरे, प्रमुख कार्यवाह प्रशांत घाडीगावकर, दादर सार्वजनिक वाचनालयाचे कार्याध्यक्ष मनोहर साळवी व इतर.